Um er að ræða fyrstu heildstæðu bókina um íslenzkan skaðabótarétt.  Bókin er afrakstur áralangra rannsókna höfundar á íslenzkum og norrænum skaðabótarétti.  Ályktanir höfundar eru reistar á lögum og lögskýringargögnum, auk fræðilegra heimilda.  Þá eru reifaðir og teknir til athugunar meira en fimm hundruð íslenzkir hæstaréttardómar og nærri 200 dómar frá öðrum Norðulöndum.  Efni bókarinnar er í sex hlutum, í þremur fyrstu hlutunum er fjallað um grundvallaratriði skaðabótaréttar en þar er viðamest umfjöllun um reglur íslenzks réttar um grundvöll skaðabótaábyrgðar og reglur um takmörkun á umfangi ábyrgðarinnar.  Í fjórða hluta er fjallað um ellefu sérsvið skaðabótaréttar, svo sem bótareglur vegna umferðarslysa, skaðsemisábyrgð, skaðabótaábyrgð barna, sérfræðiábyrgð, skaðabótaábyrgð fasteignareiganda og skaðabótaábyrgð hins opinbera.  Í fimmta hluta er fjallað ítarlega um eitt sérsvið skaðabótaréttar til viðbótar, þ.e. um bætur fyrir líkamstjón, en þær reglur hafa afar mikla þýðingu.  Í þessum hluta er einnig fjallað um tjónshugtakið og ákvörðun bóta fyrir munatjón og almennt fjártjón.  Í síðasta hlutanum er svo vikið stuttlega að reglum um endurgreiðslu auðgunar, einkum til að lýsa því hvernig og hvers vegna þær eru aðgreindar frá skaðabótareglum.