Bókaútgáfan Codex gaf nýlega út tvö rit. Annað er Afmælisrit Brynhildar G. Flóvenz. Hitt er Bótaréttur II, 2. útgáfa, eftir Eirík Jónsson og Viðar Má Matthíasson.
Afmælisrit Brynhildar G. Flóvenz
Ritið er gefið út í tilefni sjötugsafmælis Brynhildar G. Flóvenz, dósent emirita við lagadeild Háskóla Íslands, þann 12. mars 2024. Ritnefnd ritsins skipuðu þau Kári Hólmar Ragnarsson, formaður ritnefndar og dósent við lagadeild Háskóla Íslands, Hrefna Friðsriksdóttir, prófessor og deildarforseti lagadeildar Háskóla Íslands, og Ragnheiður Bragadóttir, prófessor við lagadeild Háskóla Íslands.
Árið 1999 hóf Brynhildur störf sem stundakennari við lagadeild Háskóla Íslands, hún varð aðjúnkt árið 2004 og lektor á árunum 2005 til 2010. Árið 2010 varð Brynhildur ráðin dósent við lagadeildina og gegndi því starfi óslitið síðan. Í kennslu sinni jafnt sem rannsóknum hefur Brynhildur lagt áherslu á rétt þeirra sem eru í viðkvæmri stöðu og hafa rannsóknir og kennsla hennar haldist í hendur. Meðal réttarsviða sem Brynhildur hefur fengist við í rannsóknum og kennslu eru kvennaréttur og jafnrétti, réttur flóttafólks og umsækjenda um alþjóðlega vernd, félagsmálaréttur og réttur fatlaðs fólks.
Í afmælisritinu eru 20 ritrýndar fræðigreinar sem tengjast á ólíkan hátt helstu rannsóknarsviðum Brynhildar. Þær eru eftirfarandi:
Mansal – er þróun löggjafar um mansal á Íslandi í takti við alþjóðlegar skuldbindingar, e. Öldu Hrönn Jóhannesdóttur,
Einkalífsvernd við útgáfu dóma, e. Björgu Thorarensen,
Mat á skilyrðum nauðungarvistunar, e. Eirík Jónsson,
Áhrif ofbeldis á ákvörðun um forsjá barns, e. Elísabetu Gísladóttur og Valdísi Erlu Björnsdóttur,
Rannsóknir á kynbundnum launamun og aðgerðir stjórnvalda, e. Guðbjörgu Lindu Rafsdóttur,
Lofgjörð um erfiðar konur, e. Gyðu Margréti Pétursdóttur og Svanhildi Þorvaldsdóttur,
Viðurkenningarkröfur um efnahagsleg og félagsleg réttindi, e. Hafstein Dan Kristjánsson,
Stjórnskipuleg staða réttarins til frjálsrar samkeppni, e. Hauk Loga Karlsson,
Einstaklingssniðin heilbrigðisþjónusta: Jafnt aðgengi og bann við mismunum á grundvelli erfðafræðiupplýsinga, e. Hrefnu Dögg Gunnarsdóttur,
Lífeyrisréttindi og hjúskapur, e. Hrefnu Friðriksdóttur,
Vændi – Er breytinga þörf?, e. Huldu Elsu Björgvinsdóttur,
Krafan um óhlutdrægni dómara í ljósi forskilnings og femínískrar lögfræði, e. Ingigerði Bjarndísi Írisar Ágústsdóttur,
Almenn og sértæk refsivernd flóttafólks, e. Jónatan Þórmundsson,
Hæstiréttur og jafnræðisregla stjórnarskrárinnar 2004–2024, e. Kára Hólmar Ragnarsson,
Kynferðisbrot gegn börnum eða nauðgun, e. Ólaf Egil Jónsson,
Hugtakið nauðgun frá norrænum sjónarhóli, e. Ragnheiði Bragadóttur,
Má tjá sig um veruleika kvenna? Um meiðyrðamál hér á landi eftir #metoo, e. Sigrúnu Ingibjörgu Gísladóttur,
Burðarstoð eða dragbítur inngildandi jafnréttis? Rýnt í dómaframkvæmd Mannréttindadómstóls Evrópu í aðgengismálum út frá mannréttinda- og jafnréttislíkani Samnings Sameinuðu þjóðanna um réttindi fatlaðs fólks, e. Sigurlaugu Soffíu Friðþjófsdóttur,
Jafnrétti eða jafnréttismælingar: Hvort kemur á undan hænan eða eggið?, e. Þorgerði Einarsdóttur.
Bótaréttur II, 2. útgáfa, e. Eirík Jónsson og Viðar Má Matthíasson
Bókaútgáfan Codex hefur gefið út bókina Bótaréttur II. Vátryggingaréttur og bótareglur félagsmálaréttar eftir Eirík Jónsson og Viðar Má Matthíasson í 2. útgáfu. Ritið fjallar um tvö svið bótaréttar, það er almennan hluta vátryggingaréttar og bótaúrræði félagsmálaréttar vegna líkamstjóns.
Fyrsta útgáfa kom út árið 2015 en hefur verið uppseld um nokkurt skeið. Talsverðar lagabreytingar hafa orðið á sviði vátrygginga- og félagsmálaréttar undanfarin ár og í þessari útgáfu hefur allt efni verið endurskoðað og uppfært með tilliti til þeirra breytinga, sem og nýrrar dóma- og úrskurðarframkvæmdar og nýlegra fræðiskrifa.
Sá hluti bókarinnar er fjallar um almennan hluta vátryggingaréttar er grundvallarrit um það réttarsvið og greinist í sjö hluta. Sá fyrsti felur í sér inngang, þar sem m.a. er fjallað um vátryggingafélög, dreifingu vátrygginga og úrlausnaraðila á sviði vátryggingaréttar. Annar hluti fjallar um vátryggingarsamninginn, þ.á m. um stofnun, túlkun og slit slíkra samninga, sem og um iðgjaldið og greiðslu þess. Í þriðja hluta er fjallað um réttarsambandið og ýmsar skyldur aðila, en í fjórða hluta um atvik sem takmarkað geta ábyrgð vátryggingarfélagsins.
Fimmti hluti ritsins gerir grein fyrir almennum reglum um ábyrgð vátryggingarfélagsins og sá sjötti fjallar um rétt þriðja manns til vátryggingarbóta. Í sjöunda hluta er loks vikið að uppgjöri vátryggingarbóta og brottfalli réttar til þeirra.
Sá hluti bókarinnar er fjallar um bótareglur félagsmálaréttar hefur að geyma yfirlit um önnur fjárhagsleg úrræði en krafa um skaðabætur eða vátrygginarbætur, sem til álita koma fyrir einstakling sem orðið hefur fyrir líkamstjóni eða öðru áfalli.
Þar er síðan vikið nánar að þeim þeim tveimur tegundum bóta sem hvað mesta hagnýta þýðingu hafa í tengslum við skaðabætur og vátryggingar, annars vegar bótum úr slysatryggingum almannatrygginga og hins vegar örorkulífeyri frá lífeyrissjóðum.
Eiríkur er prófessor við lagadeild Háskóla Íslands og landsréttardómari. Viðar Már er rannsóknaprófessor við lagadeild Háskóla Íslands og fyrrverandi hæstaréttardómari. Saman rituðu þeir fjögurra binda heildarverk um bótarétt, Bótaréttur I til IV, sem út komu á árunum 2015 til 2023, en Bótaréttur II er fyrsta bindið sem kemur út í 2. útgáfu.
Höfundar: Eiríkur Jónsson og Viðar Már Matthíasson
Fjöldi blaðsíðna: 764 bls.