Bókaútgáfan Codex kynnir með stolti tvö ný rit. Þau eru sem hér segir: Þjóðaréttur, 2. útgáfa, eftir Björgu Thorarensen og Pétur Dam Leifsson og Stjórnskipunarréttur. Undirstöður og handhafar ríkisvalds, 2. útgáfa, eftir Björgu Thorarensen.
Þjóðaréttur, 2. útgáfa, eftir Björgu Thorarensen og Pétur Dam Leifsson
Bókin Þjóðaréttur eftir Björgu Thorarensen og Pétur Dam Leifsson er komin út í 2. útgáfu. Í henni er fjallað um helstu grunnþætti þjóðaréttar með áherslu á uppruna, tilurð og eðli þeirra réttarreglna sem gilda í samskiptum ríkja, alþjóðastofnana og annarra viðurkenndra þjóðréttaraðila. Efnið skiptist í tólf kafla þar sem fjallað er um viðfangsefni og þróun þjóðaréttar, réttarheimildir, aðila í þjóðarétti, landsvæði og ríkisyfirráð, réttindi og skyldur ríkja og lögsögu, þjóðréttarsamninga, þjóðréttarbrot og ábyrgð ríkja, markmið og stofnanaskipulag Sameinuðu þjóðanna, úrlausn ágreiningsmála á alþjóðavettvangi, valdbeitingu í alþjóðakerfinu, mannréttindareglur á vettvangi þjóðaréttarins, og alþjóðasamvinnu og helstu sérsvið þjóðaréttar. Ýmis svið þjóðaréttarins eru skoðuð sérstaklega frá íslensku sjónarhorni. Þar má nefna áhrif reglna hafréttar á afmörkun íslensks yfirráðasvæðis, innleiðingu og stöðu þjóðréttarsamninga að íslenskum rétti og umfjöllun um helstu alþjóðastofnanir sem Ísland á aðild að.
Bókin kom fyrst út 2011 en í þessari útgáfu hefur efnið verið endurskoðað og uppfært með tilliti til breytinga á alþjóðasamningum og lögum, þróunar í alþjóðamálum og þjóðréttarsamvinnu á undanförnum áratug svo og nýrra heimilda um efnið.
Bókin er ætluð til kennslu í þjóðarétti á háskólastigi á sviði lögfræði en nýtist einnig þeim sem áhuga hafa á alþjóðamálum á vettvangi annarra fræðigreina.
Björg Thorarensen er hæstaréttardómari. Hún starfaði um árabil sem prófessor í stjórnskipunarrétti, þjóðarétti, alþjóðlegum mannréttindum og persónuverndarrétti við Lagadeild Háskóla Íslands.
Pétur Dam Leifsson er héraðsdómari. Hann starfaði um árabil sem lektor og síðar dósent, einkum á sviði almenns þjóðaréttar, hafréttar og Evrópuréttar við Lagadeild Háskóla Íslands, áður við hug- og félagsvísindasvið Háskólans á Akureyri.
Stjórnskipunarréttur. Undirstöður og handhafar ríkisvalds, 2. útgáfa, eftir Björgu Thorarensen
Bókin Stjórnskipunarréttur. Undirstöður og handhafar ríkisvalds eftir Björgu Thorarensen er komin út í 2. útgáfu. Hún kom fyrst út árið 2015 en hefur verið uppseld síðustu ár. Bókin er grundvallarrit um almennan hluta stjórnskipunarréttar, undirstöður og einkenni stjórnskipunar Íslands, meðferð ríkisvalds og takmörk þess. Fjallað er um grunnhugtök og kenningar sem stjórnskipunin hvílir á og hvernig þær birtast í störfum handhafa ríkisvalds. Rannsóknin beinist einkum að stjórnarskrá lýðveldisins Íslands nr. 33/1944, forsögu hennar, inntaki og túlkun. Í fyrri hluta ritsins er sjónum beint að undirstöðum og einkennum stjórnskipulagsins. Ítarlega er lýst áhrifum alþjóðasamvinnu á íslenskan rétt og stjórnskipun á síðustu áratugum, einkum samningsins um Evrópska efnahagssvæðið og Mannréttindasáttmála Evrópu. Í síðari hlutanum er sýnt fram á hvernig hugmyndafræðilegar undirstöður birtast í störfum æðstu handhafa ríkisvalds. Gerð er grein fyrir stjórnskipulegri stöðu og störfum Alþingis, ríkisstjórnar og ráðherra og forseta Íslands. Þá er rannsakað hvernig eftirlit og aðhald með ríkisvaldi birtist. Dómaframkvæmd er rakin með áherslu á eftirlitshlutverk dómstóla til að tempra vald annarra handhafa ríkisvalds.
Í þessari útgáfu hefur allt efni verið endurskoðað og uppfært með tilliti til lagabreytinga undanfarin ár og nýrrar dómaframkvæmdar auk fjölmargra nýrra fræðilegra heimilda.
Bókin er einkum ætluð þeim sem stunda háskólanám í lögfræði, stjórnmálafræði eða öðrum félagsvísindum svo og þeim sem vinna að rannsóknum í stjórnskipunarrétti og framkvæmd stjórnskipunarreglna.
Björg Thorarensen lauk embættisprófi í lögfræði frá Háskóla Íslands 1991 og LL.M. prófi frá Edinborgarháskóla 1993 í stjórnskipunarrétti, mannréttindum og Evrópurétti. Hún starfaði um árabil sem prófessor í stjórnskipunarrétti, þjóðarétti, alþjóðlegum mannréttindum og persónuverndarrétti við Lagadeild Háskóla Íslands. Frá 2020 hefur Björg verið dómari við Hæstarétt Íslands. Björg hefur ritað fjölmargar greinar og bækur á rannsóknarsviðum sínum, þar á meðal ritið Stjórnskipunarréttur. Mannréttindi (2. útgáfa 2019) sem myndar ásamt riti þessu heildstæða útgáfu um stjórnskipunarrétt.